انستانت بوت أم نوتري كوك؟

كتبته : | ولا تعليق واحد حتى | On : 2020-08-08 | التصنيف : أجهزة المطبخ

كتير بنسأل السؤال ده، نشتري حلة ضغط بالكهربا انستانت بوت ولا نوتري كوك. وإيه الفرق بين نوتري كوك وانستانت بوت. السؤال ده له أبعاد كتير وعشان نجاوب عليه، كان لازم أنزل بنفسي وأصور محتويات الحلتين عشان نعرف نقارنهم ببعض. مش بس كدة، أنا كمان اطلعت على الآراء اللي كاتبها الناس من خلال استخدامهم للحلتين. تابعي معايا عشان تقدري تختاري الاختيار الصح.

قبل ما نبدأ نتعرف على الفرق بين الحلتين، اللي مش عارفة إيه دول أو احنا بنتكلم عن إيه، دول ماركتين مختلفتين لحلة ضغط بالكهربا. يعني بدل ما تحطي حلة الضغط على النار، تكون جهاز بالكهربا بتضبطيها على البرنامج اللي انتي عاوزاه وهي بتشتغل وبتضغط وبتسخن وبتطفي لوحدها بدون أي تدخل منك. مش بس كدة، كمان فيها صمام أمان بيخليكي ما ينفعش تفتحيها طول ما الضغط جوة الحلة عالي، عكس الحلل اللي بتتحط على النار اللي ممكن مع سوء الاستخدام لا قدر الله، تفتحيها وهي لسة تحت ضغط عالي وبتسبب حروق في بعض الأحيان، عافانا الله جميعا.

الصناعة

انستانت بوت

حلة انستانت بوت هي ماركة كندي، ومصنعة في الصين، ده بالنسبة للي متاحة في الخليج. وهي في الحقيقة غنية عن التعريف، بينزل منها موديلات كتير جدا في أمريكا وكندا، لكن في الخليج متوفر نوعين بس منها هما انستانت بوت دو، وانستانت بوت دو بلس.

نوتري كوك

حلة ضغط نوتري كوك هي ماركة صينية من شركة نوتري بولتس وهي ماركة جديدة نوعا ما في السوق، غير متعارف عليها على موقع أمازون الأمريكي الشهير وغير متاحة للبيع عليه، لكن متاحة على أمازون الهند ومتاحة للبيع في دول الخليج.

الأفضل في الصناعة: انستانت بوت

المحتويات

انستانت بوت

حلة ضغط انستانت بوت بييجي معاها الجسم الخارجي للحلة اللي هو بيسخن ويوصل الكهربا، وحلة داخلية استانلس استيل وشبكة داخلية

نوتري كوك

حلة ضغط نوتري كوك بييجي معاها جسم الحلة الخارجي والحلة الداخلية المصنوعة من الاستانلس ستيل وشبكة داخلية ومغرفة وملعقة مصنوعين من البلاستيك المقاوم للحرارة، وغطاء للحلة من الزجاج بإطار من الاستانلس ستيل وماسكات من السيليكون.

الأفضل في المحتويات : نوتري كوك

السعة

الاتنين بيوفروا نفس السعة، ٦ و٨ لتر

الأفضل في السعة: تعادل

آراء المستخدمين

انستانت بوت

عدد مستخدمي حلة الضغط انستانت بوت على موقع أمازون الأمريكي آلاف والتقييم النهائي لها ٤.٥ من ٥ وده تقييم ممتاز

نوتري كوك

عدد مستخدمي حلة الضغط نوتري كوك على موقع أمازون الإمارات تجاوز ال ١٠٠ ودي نسبة كويسة بالمقارنة إن الحلة لسة جديدة في الخليج والتقييم ٤.٣ من ٥ وده يعتبر كويس جدا، لكن آخر تقييمات على الموقع بتظهر إن الحلة ظهر فيها عيوب أول ما تم استلامها، وفيه أزرار من شغالة فيها.

الأفضل في الآراء: انستانت بوت

السعر

سعر انستانت بوت أعلى بفرق مش بسيط عن نوتري كوك، مع الأخذ في الاعتبار إن حلة نوتري كوك اللي بتوفر أعلى إمكانيات واللي مفروض مكافئة في إمكانياتها وبرامجها .
لحلة انستانت بوت دو بلس، هي في الواقع سعرها أقل من حلة انستانت بوت اللي بتقدم برامج أقل

يعني عشان نقارن صح، هنقارن سعر نوتري كوك برايم ٨ لتر بسعر انستانت بوت دو بلس ٨ لتر فهنلاقي إن سعر نوتري كوك هو ٥٤٦ ريال سعودي في حين إن سعر انستانت بوت هو ٨٩٩ ريال سعودي. يعني فرق حوالي ٣٥٠ ريال وده طبعا فرق مش بسيط.

الأفضل في السعر: نوتري كوك

قطع الغيار والصيانة

زي ما قلت انستانت بوت معروفة من زمان جدا وبالتالي متوفر لها قطع غيار وصيانة وحتى تجارب الناس ممكن جدا نستفيد منها في أي حاجة، لكن نوتري كوك لأنها لسة جديدة مش معروف لسة مدى توفر قطع الغيار والصيانة لها.

الأفضل في قطع الغيار والصيانة: انستانت بوت

الوصفات

فيه تطبيق موبايل منفصل لأكلات انستانت بوت تقدري تستخدميه عشان تجربي الوصفات المختلفة، ده غير كمان الأكلات المتوفرة على المواقع والصفحات المختلفة. وفي اعتقادي نفس الوصفات بنفس البرامج ممكن استخدامها على نوتري كوك، فدي مش هتكون مشكلة لأي حد يشتري حلة نوتري كوك.

الأفضل في الوصفات: تعادل

النتيجة

في رأيي الشخصي، ورأيي غير ملزم لأي حد لكن هو رأيي أنا إن انستانت بوت هي الأفضل لو معندكيش مشكلة تدفعي زيادة في الفلوس لأنك في المقابل هتاخدي دعم وصيانة وهتاخدي منتج بقى له في السوق كتير جدا وأثبت نجاحه. أما لو كنتي مرتبطة بميزانية محددة فأنصحك بنوتري كوك .

أتمنى تكونوا استفادتوا من المقارنة دي، وفي انتظار تعليقاتكو وأسئلتكو، وهجاوب عليها بإذن الله.

لو حابة تعرفي أكتر عن حلة انستانت بوت، شوفي هنا

اترك تعليقاً